Ditën e sotme, Prefekti i qarkut Gjirokastër z. Astrit Aliaj së bashku me Prefektin e qarkut Vlorë z. Flamur Mamaj ishin të pranishëm në analizën vjetore të punës së spitaleve të qytetit të Sarandës dhe Delvinës.
Gjatë analizës vjetore të veprimtarisë së Spitalit të Sarandës dhe të Delvinës, drejtorët e këtyre spitaleve paraqitën një përmbledhje të punës së bërë, detyrat dhe objektivat e realizuara si dhe problematikat e evidentuara përgjatë vitit 2019.
Prefekti i qarkut Gjirokastër z. Astrit Aliaj, në fjalën e tij, theksoi rëndësinë e rritjes së bashkëpunimit midis spitalit të Gjirokastrës dhe të Sarandës në ofrimin e shërbimeve spitalore te qytetarët si dhe te vizitorët vendas e të huaj që në këto qarqe respektive, vitet e fundit ka patur një rritje të ndjeshme të numrit të turistëve.
Në këtë kuadër, z. Aliaj inkurajoi marrëveshjet e bashkëpunimit për të bërë të mundur shkëmbimin e eksperiencës së stafeve mjekësore mes spitaleve rajonale Vlorë, Fier dhe Gjirokastër, të cilat me ndarjen administrative përfshihen në rajonin jugor me qendër në Vlorë, që do të ndikojnë dhe në rritjen e cilësinë e shërbimit për pacientët që trajtohen nga këto spitale.
Categories
Lajme