Punimet në sheshin “Shqiponja”, pjesë e projektit të Unazës së Madhe të Tiranës, po vijojnë me ritme të shpejta, për të bërë të mundur përfundimin në një kohë sa më të shpejtë të kësaj vepre, e cila do të lehtësojnë ndjeshëm trafikun në kryeqytet. Kryeministri Rama ka publikuar pamje nga punimet që po kryhen për transformimin e sheshit “Shqiponja” duke theksuar se deri tani janë realizuar 25% e punimeve fizike.
“MIRËMËNGJES, dhe me këto pamje të punimeve për transformimin sa më parë të sheshit “Shqiponja”, një vepër e shumëpritur dhe e domosdoshme për kryeqytetin, ju uroj një javë të mbarë”, shprehet kryeministri Rama.
Aktualisht po punohet për ndërtimin e galerive nëntokësore tip box 3 dhe 4, ndërsa parashikohet që në fund të muajit gusht të nisë puna për fazën e tretë. Gjatë periudhës nga muaji tetor, deri në muajin prill, ku u intensifikuan punimet, janë shpronësuar rreth 202 pasuri, nga të cilat 77 kanë qenë objekte me certifikata pronësie.
Ndërsa po punohet intensivisht çdo ditë 24 orë në 7 ditë të javës, ka nisur edhe planifikimi për dy lotet e tjera. Projekti i Unazës së Tiranës synon të lehtësojë qarkullimin e automjeteve që hyjnë e dalin nga kryeqyteti, por edhe të përmirësojë edhe pamjen e një prej nyjave më të rëndësishme dhe zonës rreth saj. Ky objekt është parashikuar të ndërtohet në 5 faza. Në fund të muajit gusht pritet të përfundojnë punimet në dy fazat e para dhe të nisë puna për fazën e tretë.