Ministria e Shëndetësisë në Qipro teksa ka publikuar listën e vendeve prej të cilave nuk do të pranojë turistë dhe udhëtime gjatë kësaj kohe pandemie, shihet që ka përfshirë edhe Shqipërinë. Pra Qipro ka futut Shqipërinë në kategorinë e vendeve me rrezikshmëri të lartë, ku qytetarët e vendit tonë nuk do të lejohen të hyjnë në këtë vend gjatë pandemisë së Covid-19.

Ky vendim vjen nga autoritetet e Qipros, pasi një qytetar shqiptar që arriti nga Athina në fillim të kësaj jave rezultoi i infektuar me COVID-19. Kujtojmë se në fillim të këtij muaji, edhe qeveria hungareze i ndaloi shqiptarët, së bashku me shtetasit e pesë vendeve të tjera të Evropës Juglindore, të hyjnë në vend. Deri më tani Shqipëria ka regjistruar gjithsej 3,851 raste COVID-19, përfshirë 104 vdekje që prej fillimit të shpërthimit, ndërsa 1.610 prej tyre janë aktivë.