Një tjetër sherr mes adoleshentësh është rregjistruar së fundmi, kësaj here në Bathore. Nga një video e postuar në rrjetet sociale, shihet se si dy vajza të cilat sipas mediave studiojnë në klasën e gjashtë të shkollës “Ibrahim Basha” në Bathore po rrihen me njëra-tjetrën.

Teksa ato kapen për flokësh, bashkëmoshtarët e tyre kanë “shijuar” pamjen dhe kanë nxituar për të kapur videon të cilën më pas në rrjetet sociale e kanë shpërndarë me një këngë të reperit shqiptar ku flet për “shuplaka”, “plumba”dhe “sherre”.

Më pas kanë qenë dy djem, ata të cilët kanë vrapuar për të ndarë vajzat, të cilat siç shihet dhe nga video paskan pasur “inate” të mëdha me njëra-tjetrën dhe “s’po i zgjidhnin dot”.

Vetëm disa ditë më parë disa nxënëse të shkollës 9-vjeçare “Kongresi i Manastirit” u përfshinë në një sherr të tillë, me dhunë dhe fjalor rruge.