Rikthimi i studentëve në konviktet nën masat anti-covid, Dapi: Jo më shumë se 2 veta në dhomë

Universitetet do të hapin dyert për të pritur studentët nga 2 nëntori, ndërkohë që dhe për konviktet janë marrë masat me qëllim respektimin me rigorozitet të protokollit anti-covid dhe sigurinë e shëndetit të studentëve. Në kuadër të situatës së pandemisë, drejtoresha e Rezidencës Studentore Universitare Nr. 2, Zhanina Dapi tha për Agjencinë Telegrafike Shqiptare së këto mjedise janë gati për të pritur studentët, duke përmbushur me përpikmëri protokollin e caktuar nga ministria e Shëndetësisë, ministria e Arsimit duke krijuar mundësi dhe komoditet për studentët.

Sipas saj, janë përcaktuar personat përkatës të cilët do të masin temperaturën e studentit në hyrje të godinës, sa herë që ata zgjedhin të hyjnë apo dalin nga rezidenca studentore. “Pas rregulloreve që dolën nga ministria e Shëndetësisë dhe ministria e Arsimit, edhe ne si institucion filluam me marrjen e masave që kryesisht ishin të përgjithësuara. Mbajtja e maskës në ambientet e brendshme, tashmë e detyrueshme edhe për ambientet e jashtme, matja e temperaturës në hyrje të rezidencës e cila bëhet nëpërmjet një stafi të dedikuar që qëndron 24 orë në hyrje të godinës, për çdo student që hyn dhe del.

Njëkohësisht, kemi planifikuar masat që ndërmerren të përmuajshme apo sa herë që ne konstatojmë që kemi nevojë të bëjmë një dezinfektim. Higjienizimi i ambientit bëhet nëpërmjet stafit të RSU2 dhe njëkohësisht nëpërmjet kompanive që janë të certifikuara për të bërë higjienizimin dhe dezinfektimin e ambienteve”, u shpreh Dapi.

Më tej ajo tha se “Kemi një staf shërbimi për pjesën e higjienizimit të përditshëm të godinave, stafi sanitar është në dispozicion të studentëve, për pjesën e paradites dhe pasdites. Gjëja e parë që bëmë ishte edhe kufizimi i qëndrimit të studentëve më shumë sesa kapaciteti i përcaktuar. Në dhomat që kanë kapacitet dy, nuk rrinë më shumë se dy studentë, gjë që ndodh edhe me dhomat me kapacitet 3 persona. Në Rezidencën tonë, në konviktet e inxhinierisë së ndërtimit kapaciteti në një godinë është diku tek 270 studentë për të gjithë katet. Kuptohet që formati i studentëve është 10 studentë më shumë apo 10 studentë më pak”.