Aktorja e njohur durrsake Olta Gixhari nuk ka mbajtur dot lotët në një lidhje live me emisionin Ftesë në 5 kur moderatorja Bieta Sulo e ka pyetur për përjetimin në 26 nëntor, ditën kur një tërmet i fortë goditi vendin.
“Ishte një natë tmerri, nuk do e besoni atë që përjetuam”, tha ajo mes të tjerash.
“E kuptoj që ta risjellësh në vëmendje atë që keni përjetuar sidomos te shtëpia në Durrës”, iu drejtua Bieta teksa ajo nuk fliste dot.
Olta: Atë natë të tmerrshme isha në Durrës me familjen time, natë e zeze, por nga njëra anë them shyqyr që u ndodha atje se isha një krah shumë i fortë për prindërit e mi se do ishin vetëm. Ka qenë një situatë shumë e vështirë një tragjedi shumë e madhe.
Fatmirësisht unë dhe familja ime gëzojmë shëndet të mirë, shtëpinë e kemi braktisur, kemi ikur nga frika dhe s’do shkelim në atë ndërtesë deri sa ekspertet të na thonë është apo jo i banueshëm. Gjatë atyre sekondave dritat u prenë, na binin gjera në kokë, në trup dhe na bllokuan derën e jashtme.
Mua me ra gjithë dollapi i këpucëve që është sa faqe e murit, na bllokoi derën, gjunjët i kemi të nxirë, dëmtimi i madh është psikologjik, kemi pësuar shok.
Momenti më i tmerrshëm ishte kur të tre u përqafuam dhe nisem të luteshim, ishte si dorëzim, dera nuk na hapej dhe menduam se aty mori fund çdo gjë. Ishte terr, nuk kuptoja pse po rrezohesha.
Zhurmat ishin shumë të mëdha, ne banojmë edhe në kat të shtatë dhe zbritja e shkalleve zbathur ishte një tmerr me vete”.