Për herë të parë vendi ynë kualifikohet në këtë garë pas 70 vjetësh Të rritesh pa frymën prindërore për çdo fëmijë është mjaft e vështirë. Të njëjtin fat ka patur edhe Alfred Muharremi, por ai gjithnjë ka qenë i rrethuar nga dashuria e nënave të fshatit SOS. Sot ky fshat numëron plot 63 fëmijë, 37 të rinj dhe 800 familje që marrin mbështetje nga programet që ofron SOS e që rriten në sajë të përkujdesjes së madhe, jo vetëm nga ana morale, por edhe arsimore njëherazi. Alfred Muharremi është nominuar ndër tetë finalistët e çmimit ndërkombëtar “Hermann Gmeiner”, në nder të figurës së themeluesit të SOS, për të vlerësuar në nivel global të rinjtë nën kujdesin e kësaj organizate të pavarur, që janë model për shoqërinë. Muharremi thekson se të gjithë fëmijët të cilët janë rritur në fshatin SOS i konsideron motra dhe vëllezër, ku së bashku kanë realizuar projekte kombëtare dhe lokale me natyrë humane, artistike dhe sociale, ku në fokus qëndrojnë 1230 fëmijë dhe 212 të rinj.

Por si paraqitet situata e fëmijëve jetimë sot në Shqipëri ? Sipas Alfredit në vendin tonë ka institucione të përkujdesjes shtetërore dhe private për fëmijët pa kujdes prindëror. Është shumë e dhimbshme situata me të cilën përballen të rinjtë të cilët largohen nga këto institucione në moshën 18-vjeçare, pasi enden rrugëve për shkak të papunësisë. Çmimi “Hermann Gmeiner Award”, jepet prej 70 vitesh një herë në çdo dy vjet nga 559 fshatra SOS në 136 vende të botës. Për Alfredin ky lloj çmimi përcjell një mesazh shumë të fortë. Për të votuar Alfred Muharremin, votimi bëhet nëpërmjet faqes online deri në datën 23 Korrik. Shqipëria për herë të parë pas 70 vjetësh kualifikohet në finalen e madhe dhe ndodhet përballë vendeve si Rumania, Liberia, etj në çmimin që shkon për kategorinë meshkuj. Klan Plus