Kryeministri Edi Rama foli sot në Organizatën e Kombeve të Bashkuara pas nisjes së mandatit të Shqipërisë në Këshillin e Sigurisë. Kjo pjesëmarrje është një gur themeli për Shqipërinë, tha kreu i qeverisë, pas ndryshimeve rrënjësore që ka pësuar vendi që pas diktaturës. “Shqipëria ishte një bunker për thuajse gjysmë shekulli, vuajti një nga regjimet më të forta të Europës. Na quanin Koreja e Veriut në Europë.

Shumë herë, rrota e historisë lëviz në drejtime të çuditshme. Zgjimi për ne erdhi vonë, por i mbajtëm sytë nga drita dhe në një drejtim të vetëm: lirisë, demokracisë, të drejtave të njeriut.  Që prej asaj kohe, Europa ka qenë shembulli ynë. Rruga drejt lirisë dhe demokracisë ka qenë e vështirë. Bota ka ndryshuar në 66 vitet e fundit. Shqipëria ka pësuar transformim rrënjësor. Tre dekada më parë vendi ishte në terr,” tha Rama.