Teksa qëndronte përkrah banorëve të zonës së Bregut të Lumit, deputetja e Partisë Demokratike Jorida Tabaku deklaroi se qeveria nuk ka asnjë vendim të Këshillit të Ministrave për shembjen e banesave të këtyre banorëve.

“Ky shtet për mua ka përfunduar. Nëse na cënojnë pronën, pasurinë që ju keni vendosur me 25 vite pune, atëherë se di se çfarë na ngelet në dorë. Në emër të PD i premtova banorëve se kjo parti ka të njëjtin standard. Do kemi këtë standard për këta banorë, që të dëmshpërblehen. Nuk mund të pranojmë që sot fëmijët të nxirren në rrugë dhe investimi i gjithë jetës së këtyre banorëve të shkelet me këmbë. Këta banorë këtu kanë përfunduar procesin e legalizimit. Ligji nuk e lejon që këto të nxirren nga banesa. Këtu janë 46 banesa, por janë disa familje pasi banojnë disa krerë në një shtëpi”, deklaroi Tabaku.

Familjet e Bregut të Lumit nuk kanë marrë akoma dëmshpërblim për banesat e shëmbura për Bulevardin e Ri.