Një ngjarje e rëndë ndodhi pasditen e kësaj të marte në Gricignano d’Aversa, në Caserta të Italisë. Një 26-vjeçar shqiptar humbi tragjikisht jetën teksa ndiqej nga karabinierët. Sipas mediave italiane, i riu shqiptar, emri i të cilit nuk është bërë ende publik, udhëtonte së bashku me një tjetër person me një makinë Fiar Croma të bardhë.
Sapo pa karabinierët, ai tentoi të largohej duke i dhënë gaz mjetit. Por teksa u gjend në një kthesë të ngushtë, 26-vjeçari humbi kontrollin e makinës, duke u përplasur me barrierat anësore të rrugës.
Pas përplasjes, pasagjeri që ndodhej në makinë doli dhe tentoi të arratisej në këmbë. Megjithatë tentativa e tij dështoi pasi u kap nga karabinierët. Sa i përket shoferit 26-vjeçar, ai gjeti vdekjen e menjëhershme.
Mediat italiane shkruajnë se autoritetet kanë nisur hetimet për të kuptuar arsyet se përse shqiptari tentoi t’i shpëtonte karabinierëve, tentativë që çoi edhe në aksidentin fatal./tvklan.al