Lajme

Termeti, Rama dorëzon bllokun e parë i shtëpive të rindërtuara në Vaqarr

Pak ditë nga 2-vjetori i tërmetit tragjik të 26 Nëntorit 2019 në Tiranë është inauguruar Lagjja e parë e Programit Kombëtar të Rindërtimit, Lagjja e re në Vaqarr, e ringritur nga e para pas rrënimit të 2 viteve më parë.

Plot 20 familje të kësaj zone kanë marrë sot çelësat e banesave të reja të rindërtuara prej donatorëve të shumtë që iu bashkuan thirrjes së qeverisë për tu solidarizuar me të prekurit e tërmetit që gjunjëzoi Shqipërinë dy vite të shkuara.

Kryeministri Edi Rama, kryetari i Bashkisë së Tiranës, Erion Veliaj, ministri i Rindërtimit, Arben Ahmetaj ishin sot në lagjen e re të Vaqarrit ku dorëzuan një prej investimeve më moderne të Programit të Rindërtimit.

Kryebashkiaku Veliaj gjatë fjalës së mbajtur në ceremoninë inauguruese të këtij blloku rezidencial u shpreh krenar që Programi i Rindërtimit po e kthen sfidën e tërmeteve nga një fatkeqësi në një potencial transformimi të zonave më të skajshme të kryeqytetit.

“Me këtë projekt ne fillojmë një seri lagjesh të tilla. Lagjja tjetër do të jetë në Ndroq. Është rreth 3 herë më e madhe dhe me rreth 70 shtëpi. Të njëjtën gjë po bëjmë në Zallherr ku kanë mbaruar karabinatë. 55 shtëpi të tjera në Baldushk dhe presim të fillojmë për punë ditësh projektin e një lagjeje të ngjashme në Pezë të Madhe. Ky model që ngremë sot realisht e ngre stekën, ndërton një etalon se çfarë do të thotë të shkojmë nga ndërtesa të vetmuara nëpër cepa, në një bashkëjetesë, në një komunitet,” u shpreh Veliaj.

Kreu i Bashkisë u ndal edhe te projekti më ambicioz i rindërtimit në kryeqytet, sic është ai i lagjes “5 Maji”. Ne sapo kemi filluar kantieret e reja në lagjen “5 Maji”, ndërkohë që para Vitit të Ri do të mbarojnë pallatet e para dhe do të futen 100 familjet e para te rruga “5 Maji”. Aty tani kemi filluar përveç pallateve edhe pjesën e infrastrukturës për t’u siguruar që ndjehesh në Tiranë. Kur shikon ndriçimin led, kur shikon rrugën, trotuare, mënyrën e mbledhjes së plehrave, furnizimin me ujë. Atje kemi filluar infrastrukturën dhe do të jemi me Kryeministrin përpara Vitit të Ri me familjet e reja të lagjes “5 Maji”.

Veliaj ka folur edhe për procesin e rindërtimit në një tjetër lagje të re, atë të Kombinatit. “Ne do të transferohemi pastaj te kantieri tjetër i Kombinatit për të cilin dua të sqaroj disa gjëra. Kemi një proces shumë të ndershëm të trajtimit të qytetarëve derisa të mbërrijnë në shtëpi dhe të marrin çelësat.

Kemi një proces ku secili do të vijojë të marrë bonusin e qerasë dhe nuk do të duhet të tutet as nga tallazet e politikës, as nga histeritë lokale, as nga thashethemet e lagjes. Secili do ta marrë deri në ditën e fundit bonusin e qerasë për të jetuar në një shtëpi dinjitoze edhe pse të përkohshme derisa të marrë shtëpinë e vet të përhershme,” tha kryebashkiaku.

Kryeministri Edi Rama deklaroi se i gjithë ky proces po ndryshon jetën e 33 mijë familjeve të goditura nga tërmeti i 26 nëntorit të 2 viteve më parë.

“Janë mbi 500 familje vetëm në Bashkinë e Tiranës dhe mijëra të tjera që banojnë në apartamente të rikonstruktuara dhe ndërkohë jemi në fazën që fillojmë me blloqet ku së shpejti do hyjnë në shtëpi jo vetëm ata që janë në pritje në Ndroq, apo në Zall Herr por dhe pika të tjera si “5 Maji” këtu në Tiranë, e cila do jetë lagje shembullore pasi gjithçka po ndërtohet nga e para dhe do krijohet edhe një hapësirë e re urbane,” u shpreh ndër të tjera kryeministri.

Rama tha se kjo lagje në Vaqarr është një mundësi shumë e mirë për të gjithë komunitetin aty.

“Kjo është një lagje që i ka pranë të gjithë që krijon kushte të reja për të gjithë ata që 2 vite me parë mbetën pa çati mbi kokë, dhe sot jo vetëm kthehen në shtëpi, që janë shumë më mira se ato që humbën dhe kanë më shumë seç kishin kur goditi ajo tragjedi e madhe. Janë bërë ndërhyrje që kanë prekur jo vetëm muret e apartamenteve por edhe fasadën dhe ambiente të mëdha.

Së shpejti do të hyjnë në shtëpi jo vetëm ata që janë në pritje në Ndroq e Zall Herr, apo në pika të tjera në Tiranës , si ajo e 5 majit, që do jetë lagjia më urbanistikisht shembullore e Tiranës, dhe do u japë mundësinë banorëve që te jenë banorë të një hapësire tjetër urbane.

Po kështu edhe me Kombinatin , ku është bërë një punë goxha e mundimshme, në ditët e ardhshme do të hyjnë në shtëpi banorët e Bubqit. Po ashtu vijon puna në Thumanë, sot Laçi po bëhet një qytet nga e para. Në Lezhë , Kavajë, apo deri në Mirditë pranë Rrëshenit ku ka nje tjetër lagje që është drejt përfundimit.Të gjitha këto janë momente kurorëzimi të një përpjekje e cila ka zgjat 2 vite dhe duhet të mbajmë parasysh se në këto 2 vite jeta e vendit nuk ka qenë e lehtë, dhe kjo punë u shty në kohë për shkak të pandemisë”, tha Rama.

Kryeministri sqaroi më tej edhe çështjen e e financimit të këtyre njësive të banimit.

“Këtu nuk ka para të botës, pjesa tjetër e shkollave është me fondin e BE dhe të miqve të vendit tonë. Blloku i parë i Laçit i ndërtuar me financimin e Turqisë, dhe ai në Spitallë me financimin e princit të Kurorës së Arabisë Saudite. Për ata që thonë ku i çuat paret, dua tju them se fondet nga të tretë , nuk kalojnë përmes qeverisë shqiptare asnjë qindarkë, paratë e botës, bota i shpenzon vetë, janë fonde që i administrojnë vetë, me projekte ku ne kemi fjalën e fundit, por që i bëjnë vetëm, me tendera që i bëjnë vetë dhe në fund dorëzojnë produktin. Ne jo vetëm nuk u gjunjëzuam nga goditja, por po bëjmë të mundur që ata që u goditën të ngrihen me të fortë, sot këto familje kanë një trashëgimi më të madhe.

Jam shumë krenar që po japim këto shtëpi, sot këto familje të varfra po i marrin falas, që s’do të kishin mundësi të bënin vetë, se në Turqi përshembull i marrin me kredi. E fundit, për të gjithë ata që ende s’kanë hyrë në shtëpi, dua t’ju them se do mbështeten nga ne, kini durim se këto janë procese të vështira.  Vitin e ardhshëm do ti pastrojmë të gjitha gjurmët e tërmetit”, tha Rama.

Në njësitë administrative Bërzhitë, Baldushk, Krrabë, Vaqarr, Petrelë dhe Lagjen 13 janë gjithsej 510 banesa individuale që përfitojnë nga Programi i Rindërtimit nga të cilat 381 kanë përfunduar. Në Njësinë Administrative Vaqarr ka përfunduar edhe ndërtimi i infrastrukturës publike dhe gjithashtu do të ndërtohet shkolla e re dhe po vazhdon puna në Ndroq, Baldushk, Zall Herr për 182 shtëpi të reja.

Artikuj të ngjashëm

Leave a Reply

Your email address will not be published. Required fields are marked *

Back to top button
Close
%d bloggers like this: