Një aksident i rëndë ka ndodhur pasditen e kësaj të enjteje në rrugën “Xhanfize Keko” në Tiranë.  Sipas policisë automjeti tip “Benz” i drejtuar nga një 19-vjeçar ka dalë nga rruga, duke përfunduar në trotuar dhe më pas është përplasur me një pemë.  E pranishme ishte edhe një kalimtare rreth të 30-tave, e cila ka mbetur e plagosur.

Policia thotë se ka shoqëruar drejtuesin e mjetit dhe është marrë në pyetje për të zbardhur ngjarjen. Ndërkohë e plagosura është dërguar në Spitalin e Traumës dhe ndodhet në gjendje të rëndë shëndetësore.

Paraprakisht dyshohet se shkak i aksidentit ka qenë shpejtësia e madhe e makinës, por edhe terreni i lagësht.

Tiranë/Informacion paraprak Rreth orës 19:15, në rrugën “Xhanfizo Keko” mjeti me drejtues shtetasin J. B., 19 vjeç, ka aksidentuar një këmbësore ende të paidentifikuar rreth 30 vjeçe, e cila ndodhet në spital, nën kujdesin e mjekëve. Drejtuesi i mjetit po shoqërohet në ambientet e Komisariatit nr.4, për veprime të metejshme hetimore. Grupi hetimor ndodhen në vendngjarje dhe po punon për sqarimin e rrethanave të ngjarjes.