Dy ditë pas arrestimit, ish-zyrtarja e kryeminsitrisë Alda Klosi e cila u arrestua mbrëmjen e së premtes pas akuzave për pastrim parash, është shtruar me urgjencë në spital pasi ka shfaqur probleme shëndetësore. Mësohet se Klosi ka shfaqur probleme shëndetësore gjatë mëngjesit së ditës së dielë dhe është transportuar drejt spitalit.
Kujtojmë që Klosi u arrestua mbrëmjen e 3 Shkurtit pas deklarimit në polici të pastrueses Rozeta Dobi, e cila tha se paratë nuk i kishte vjedhur por i ruante, pasi alda kishte frikë mos ia merrte ish-bashkëshorti. Alda Klosi dyshohet nga Prokuroria e Tiranës se nuk ka deklaruar pasurinë sipas ligjit, si dhe është përfshirë në pastrim parash dhe ka bërë deklarim të rremë para oficerëve të policisë gjyqësore. Akuza e fundit është e lidhur me historinë e vjedhjes së banesës, për të cilën u vu në pranga sanitarja Rozeta Dobi dhe djali i saj Havier Dobi në fillim të muajit Janar.
Deklarimet parapake për sasinë e parave të vjedhura, por edhe pretendimet e Rozeta Dobit në dëshminë e dhënë së fundmi, se vjedhja ishte inskenim dhe paratë ishin marrë me kërkesë të vetë Klosit, e çuan atë nën hetim për deklarim të rremë.
Gjithashtu, pretendimet e tjera të Rozeta Dobit se ka qenë dëshmitare e lëvrimit të vlerave të larta të parave kesh në banesa të lidhura me Klosin dhe persona të tjerë, ka çuar në ngritjen e akuzës së pastrimit të parave dhe mosdeklarimit të të ardhurave.
Prokuroria e Tiranës është duke hetuar mbi ekzistencën e këtyre parave, 400 mijë euro të gjetura në tubin e ajrimit në banesën e sanitares dhe burimin kriminal të tyre, që deri në këtë fazë të hetimit nuk është përcaktuar ende.