Në raportin e avokatit të popullit thuhet se vdekja e 32-vjeçarit Lear Kurti i cili humbi jetën në duart e efektivëve të uniformave blu mund të ishte parandaluar nëse do të ishte vepruar konform ligjeve nga policia. Pas raportit të bërë publik nga Avokati i Popullit, në një intervistë për News24, Fatmira Mustafaj, nëna e Laer Kurtit tha se djali i saj nuk kishte probleme shëndetësore. Ajo tha se djali i saj ka ikur nga duart e policisë.
“Djali im nuk ka pasur probleme shëndetësore, por edhe sikur i duhej dhënë ndihma e shpejtë. Dua të më qetësohet shpirti dhe të dalë e drejta. Djali i m ka ikur nga duart e atyre. Iku nga dhuna. Nuk di. Djali im ishte si gjithë të tjerët, nuk ishte në atë gjendje që të përfundonte ashtu, por thjeshtë nuk i është dhënë ndihma e parë. Fatkeqësisht unë nuk besoj dhe jam shumë e zhgënjyer këtë shtet sepse vë në faj personat që ikin nga kjo jetë. Nga aq sa pash nga rrethanat si iku, vë në faj efektivët që kapën djalin tim”, u shpreh ajo.
Në raport theksohet se uniformat blu kanë kryer disa shkelje ligjore.
“Në deklarimet e tyre punonjësit e policisë të cilët kishin kryer shoqërimin e shtetasit Lear Kurti kishin të paqartë dhe kontradiktor faktin e pohimit të përkeqësimit të gjendjes shëndetësore të këtij shtetasi si dhe arsyen se përse ky shtetas u shoqërua në ambientet e komisariatit nr.3 Tiranë dhe nuk iu dha ndihma mjekësore e menjëhershme duke e dërguar në urgjencën e Spitalit Universitar të Traumës pasi dhe distanca nga vendi i shoqërimit drejt spitalit ishte e shkurtër”.
“Rezulton se punonjësit e policisë kanë vepruar në kundërshtim ligjin, sepse nuk mund të bëhet shoqërimi i një personi duke u mbështetur vetëm në dyshime të pa arsyeshme. Dyshimet duhet të jenë të arsyeshme, për kryerjen e një krimi, për të parandaluar kryerjen e një vepre penale, ose për identifikimin e personit ndaj të cilit zhvillohen hetime në rastin konkret, nuk ndodhemi as para shoqërimit, ndalimit dhe as para arrestimit në flagrancë”.