Ka zgjatur pak çaste arratia e një të riut, i cili u arratis nga vendi i ngjarjes pasi kreu një grabitje. Ngjarja ndodhi në Elbasan. Burime zyrtare nga policia bënë me dije se i riu me inicialet E.S., nën kërcënimin e një thike vodhi disa artikuj ushqimor në një supermarket dhe tentoi të largohej. Me marrjen e njoftimit se në një supermarket te rruga “Rinia” në lagjen “Aqif Pasha” në qytetin e Elbasanit, një shtetas nën kërcënimin e një mjeti të mprehtë thikë, ka vjedhur disa artikuj ushqimor dhe është larguar, menjëherë shërbimet e Policisë kanë shkuar në vendngjarje dhe falë veprimeve të shpejta dhe profesionale bënë të mundur identifikimin,
kapjen dhe arrestimin në flagrancë të autorit të dyshuar, shtetasin E.S., 33 vjeç, banues në Elbasan. 33-vjeçari me precedent të mëparshëm penal në fushën e vjedhjes është kapur nga forca e posaçme “Shqiponjat”, në afërsi të banesës së tij. Në cilësinë e provës materiale u sekuestrua thika e përdorur nga autori.Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme.