Një 17 vjeçar shqiptar humbi jetën si pasojë e një zjarri që shpërtheu në një qendër pritje në zonën e Udines në Itali.
Mediat njoftojnë se dy persona të tjerë kanë mbetur të plagosur, mes tyre një 16-vjeçar, i cili u transportua me helikopter në gjendje të rëndë për në qendrën e djegieve në Verona.
Mediat italiane njoftuan se zjarri ka rënë rreth orës 2:30 për shkaqe që ende po hetohen.
Godina e përfshirë nga flakët i përket një qendre pritje për të miturit, e njohur si organizata jofitimprurëse AEDIS. Ata që kanë dhënë alarmin për zjarrin, kanë qenë banorët e pallatit ngjitur me qendrën.
Pas mbërritjes së forcave të zjarrfikëses flakët janë shuar plotësisht ndërsa kanë nisur hetimet për shkakun e zjarrit.
Forcat zjarrfikëse që mbërritën në vendin e ngjarjes me policinë gjetën trupin e pa jetë të të riut.
Kreu i komunitetit të të rinjve Michele Lisco, ka thënë se viktima është një 17-vjeçar shqiptar që ishte pjesë e qendrës prej rreth një viti.
Sipas dëshmitarit, i riu shqiptar ishte një djalë shumë i mirë. Hetimet për ngjarjen po kryhen nga Karabinierët të cilët kanë mbledhur tashmë dëshminë e personit përgjegjës për të rindërtuar dinamikën e asaj që ndodhi në detaje.
Një tjetër dëshmitar i qendrës ka thënë se dëgjoi “britma gjatë natës dhe pasi u zgjua godina ishte plot tym, ndërsa dikush u hodh nga dritaret pasi frymëmarrja ishte e pamundur”.
Policia ka bërë të ditur se kati i dytë i godinës dhe pjesa e çatisë ishin përfshirë plotësisht nga flakët.