Kryetari i Partisë Demokratike, Lulzim Basha, ka vijuar me sulmet ndaj qeverisë dhe Kryeministrit Edi Rama, ndërsa nuk është kursyer as ndaj gazetarit Carlo Bolino, i cili është njëherësh pronar i ‘Report TV’.
I ftuar në studion e emisionit “5 pyetjet nga Babaramo”, Basha e ka quajtur këtë televizion si “ERTV fraksion 2”, pasi sipas tij është i kapur dhe në shërbim të qeverisë.
“Si televizion ky nuk ka shpresë se është televizion i kapur nga qeveria. Ky është ‘ERTV fraksion 2’, por ka edhe ERTV fraksion 3, fraksion 4”, tha Basha, ndërsa vijoi më tej debatin me gazetarin Babaramo, i cili e akuzoi se edhe ai i kishte dhënë të gjithë fushatën prej miliona eurosh një televizioni.
Pas kësaj Basha është përgjigjur sërish me sulm, ndërsa e sfidoi duke i kërkuar emrin e televizionit.
“Më nxjerr emrat apo dokumentet ku unë kam firmosur e kam marrë milionat. Më nxjerr një dokument që tregon se i kam dhënë dikujt Bunkartin pa para”, – tha Basha.
