Kryeministri Rama dhe Presidenti Meta pritet të përballen në një seancë gjyqësore në Gjykatën Kushtetuese në lidhje me kompetencat për dekretimin e ministrave. Përmes një kërkesë Rama ka kërkuar interpretimin e nenit 98, pika 1 të Kushtetutës për të drejtën e emërimit dhe shkarkimit të minisitrave.
Seanca do të mbahet më datë 25 mars 2021 dhe trupës së Gjykatës Kushtetuese do t’i duhet të shprehet se si do të veprohet më pas për çështjen e emërimit të ministrave. Padia e Ramës u depozitua pas përplasjes me Presidencën për mosdekretimin e Gent Cakajt si ministër i Jashtëm duke detyruar Ramën që të mbajë “de jure” këtë post. Çfare parashikon neni 98 i Kushtetutës Ministri emërohet dhe shkarkohet nga Presidenti i Republikës, me propozim të Kryeministrit, brenda 7 ditëve.
2. Dekreti shqyrtohet brenda 10 ditëve nga Kuvendi.
Kufizimi i kompetencave të Metës Pika 1 e nenit 98 të Kushtetutës parashikon se ministri emërohet dhe shkarkohet nga Presidenti i Republikës brenda 7 ditëve me propozim të kryeministrit dhe më pas dekreti shqyrtohet brenda 10 ditëve nga Kuvendi.
Në këtë pjesë, Kushtetuta nuk përcakton se çfarë ndodh nëse presidenti nuk shprehet mbi propozimin e kryeministrit. Për t’i zënë rrugën kësaj, maxhoranca dërgoi në Kuvend disa ndryshime ligjore për kompetencat e Presidentit të Republikës duke i vendosur atij katër kufizime gjatë ushtrimit të detyrës.
Duke u nisur nga precedenti i mos dekretimit të Gent Cakajt si ministër i Jashtëm, Kuvendi ka parashikuar që Presidenti duhet të shprehet brenda 7 ditëve në lidhje me dekretimin apo mos dekretimin e një ministri. Nëse kjo nuk ndodh, atëherë ministri emërohet nga Kuvendi. Precedenti i dytë lidhet me anulimin e datës së zgjedhjeve. Kështu, nëse Presidenti kërkon të anulojë apo shtyjë zgjedhjet, ai duhet të rakordohet me partinë më të madhe në Kuvend. Nëse kjo e fundit nuk jep konsensusin, Presidenti e ka të pamundur të vendosë.
Ky ndryshim u nis nga precedenti i zgjedhjeve të 30 qershorit, ku Meta i anuloi ato përmes një dekreti, i cili në fakt nuk u mor parasysh nga maxhoranca socialiste. Ndryshimi tjetër i rendësishëm lidhet me betimin e anëtarëve të Gjykatës Kushtetuese dhe asaj të Lartë. Sipas ligjit të ri, nëse Presidenti nuk thërret brenda shtatë ditëve për bëtim gjykatësin, atëherë ai mund të betohet para KLGJ-së.
Duket se maxhoranca ka bërë disa ndryshime në ditët e fundit në projektligj duke rregulluar edhe procesin e dhënies së shtetësive. Ligji i ri ia njeh presidentit këtë të drejtë, por e detyron atë që të konsultohet ngushtësisht me organet e sigurisë dhe Minsitrinë e Brendshme për çdo rast.
