Kryeministri Edi Rama u pyet sot nga gazetarët, nëse kundërshtarët e tij politikë i kishin ndjekur si duhet masat e vendosura për të frenuar përhapjen e Covid 19. Duke iu referuar gjobave në ditëlindjen e Bes Kallakut, Rama tha se presidenti dhe zonja e parë dhanë një shembull skandaloz të shkeljes së ligjit.
“Si të gjithë të tjerët kam parë atë që nuk do të doja ta shihja as unë dhe as të tjetër. Shembullin më skandaloz të shkeljes së ligjit nga Presidenti i Republikës, Zonja e Parë dhe nga e gjithë çeta e tyre. Është shumë e qartë që nuk mund të bëhen festa e dasma, aq më tepër ceremoni të dhimbshme mortore.
Na shfaqen në një spektakël të pështirë të karshillëkut jo vetëm me ligjin, por edhe me vetë shëndetin e të tjerëve, në rast se nuk janë të interesuar për shëndetin e tyre. Më shumë se kaq s’kam parë ndonjë gjë të veçantë”, deklaroi Rama.