Është përfolur shumë herë kohët e fundit për raportin mes dy këngëtareve shqiptare me famë botërore Dua Lipa dhe Rita Ora. Në mediat rozë ka qarkulluar lajmi se dy artistet e njohura nuk flasin me njëra-tjetrën. Shkak për këtë zënkë mendohet të ketë qenë momenti pasi Rita arriti të bëhej e famshme dhe më pas nuk ndihmoi edhe Duan të ndiqte po të njëjtën rrugë si ajo. Por megjithatë motivin e vërtetë e dinë vetëm ato, pasi asnjëra nuk ka bërë një reagim lidhur me këtë çështje.
Së fundmi teksa ka ardhur koha të pajtohen e të mbështesin njëra-tjetrën si dy shqiptare në botë, duket se është i ati i Duas, Dukagjin Lipa, ai i cili po mundohet të bashkojë dy këngëtaret, duke iu treguar atyre miqësinë që kanë pasur para shumë vitesh dy gjyshërit e artisteve në fjalë. “Babai im Seit Lipa dhe zoti Besim Sahatçiu. Gjyshërit e Dua Lipës dhe Rita Orës duke pirë bashkë në vitin 1960 në Pejë.”- shkruan Lipa.
Ndërsa në këtë foto mjaft domethënëse të dy zotërinjve, ka pasur edhe komente pikante. “Shumë bukur, e çuditshme është se mbesat e këtyre dy figurave nuk i pamë bashkë kurrë”. A do t’i shohim ndonjëherë?”- është një nga komentet që nxjerr në pah mungesën e bashkëpunimit mes dy shqiptareve që i njeh e gjithë bota.