Tomas Strakosha është duke kaluar një nga sezonet më pozitivë në aspektin personal. Por edhe në atë ekipor, pasi Lacio e tij po ecën në ritme të larta në kampionat duke u pozicionuar momentalisht në vendin e katërt të kampionatit.

Sakaq, statistikat e fundit tregojnë rritjen e gardianit të Kombëtares shqiptare në krahasim me sezonet e kaluara. Këtë sezon, 24-vjeçari ecën me ritmin e 3.5 pritjeve për ndeshje, ndërsa duke sjellë në vëmendje sezonet e kaluara asnjëherë nuk ka qenë kaq lartë.

Kështu, një sezon më parë kjo shifër ka qenë 2.7. Në sezonin 2017-18, diçka më mirë duke prekur kuotën 3.0, ndërsa në sezonin 2016-2017, ka qenë e regjistruar në 2.9 pritje për ndeshje. Në këtë formë, portieri po kalon një formë të shkëlqyer dhe konfirmohet si një nga më të mirët në elitën e futbollit italian.