Chapecoense, klubi që u bë i famshëm pas aksidentit ajror që ndodhi në nëntor të vitit 2016, ka humbur presidentin e saj për shkak të COVID-19. Paulo Ricardo Magro ishte shtruar në spital prej 18 dhjetorit dhe më pas pati komplikime dhe ishte në repartin e trajtimit intensiv. Ditën e sotme ai e ka humbur betejën më të rëndësishme dhe ka vdekur. Klubi i Chapecoense e ka konfirmuar lajmin e vdekjes përmes një komunikate: “Thellësisht të tronditur dhe me zemrat e copëtuara nga trishtimi, raportojmë vdekjen e presidentit të Chapecoense, Paulo Ricardo Magro, të mërkurën e 30 dhjetorit.

Paulo ishte 57 vjeç dhe ishte përgjegjës për rinisjen e Chapecoense, brenda dhe jashtë fushe. Ai bëri të mundur që ekipi të ecte sërish në një rrugë fitimtare, me dinjitet dhe punë, vlera të predikuara shpesh nga presidenti ynë i dashur. Jemi të trishtuar, por të gjithë shprehim mirënjohje për njeriun që hyri në historinë tonë dhe u bë i përjetshëm në të, duke e rindërtuar klubin dhe ekipin sërish. Në këtë moment u kërkojmë tifozëve që të bashkohen me lutjet tona për familjen dhe miqtë”.