Agjencia e Sëmundjes Infektive në Europë u bëri thirrje vendeve të vazhdojnë të zbatojnë masat e duhura për distancimin fizik dhe higjienën, si edhe të testojnë dhe gjurmojnë rastet për të frenuar pandeminë e koronavirusit të ri. “Rreziku i përshkallëzimit të mëtejshëm është i moderuar për vendet që zbatojnë masa të tilla”, tha Mike Catchpole, shkencëtar kryesor në Qendrën Europiane për Parandalimin dhe Kontrollin e Sëmundjeve (ECDC).

“Nga ana tjetër, rreziku i përshkallëzimit është shumë i lartë për vendet që nuk i zbatojnë ose forcojnë masat, përfshirë distancimin fizik dhe gjurmimin e kontaktit”, shtoi ai në një deklaratë. Ndërsa pandemia vazhdon, Catchpole theksoi se ishte e rëndësishme që popullata të jetë e vetëdijshme se virusi vazhdon të qarkullojë brenda komuniteteve dhe se ata mund të zvogëlojnë ekspozimin e mundshëm me masat e përditshme.