Eskluzive Panorma
BESARTA BASHA/ Rreth katër muaj nga mbyllja e aplikimeve, Komisioni i Strehimit dhe Çështjeve Sociale në Bashkinë e Tiranës ka caktuar emrat e fituesve, që përfitojnë kredi të subvencionuar.

Gazeta ka siguruar listën me emrat e 456 familjeve me të ardhura të ulëta, të cilat nuk mund të blejnë një apartament në kushtet e tregut të lirë. Drejtoria e Strehimit ka kualifikuar dhe marrë në shqyrtim 1082 dosje, nga të cilat 77 janë skualifikuar për parregullsi, mangësi në dokumentacion dhe të ardhurat mbi dhe nën limit.

Kështu, nga 1005 dosje të rregullta, komisioni përkatës ka përzgjedhur 456 fitues bazuar në sistemin e pikëzimit. Por nuk humbet shpresa për aplikuesit e tjerë të rregullt.

“Komisioni vendosi që pjesa prej 549 familjeve të vendosura në listën e pritjes, e cila do të jetë e zbatueshme për rastet kur familjet e shpallura fituese nuk paraqiten, heqin dorë, nuk pranojnë dhe/ose refuzojnë që të lidhin kontratën përkatëse me institucionin financiar bankar të përzgjedhur nga Bashkia Tiranë”.

Emrat e listës së mëposhtme kanë kaluar një ditë më parë në Komisionin e Strehimit dhe Çështjeve Sociale, ndërsa këtë të premte pritet të marrin “OK” edhe në Këshillin Bashkiak. Shumica e tyre, 337 janë fitues të shumave për blerjen e apartamenteve të strukturës 1+1, ndërsa 81 të tjerë 2+1, 36 garsoniere dhe vetëm 2 apartamente në strukturën 3+1. Fituesit marrin nga banka shuma nga 4.4 milionë deri në 8.9 milionë lekësh, vlerë që duhet të shlyejnë brenda 20 vitesh, për të cilën paguajnë interes 3%, pasi pjesën tjetër e mbulon Bashkia e Tiranës.

Nisur nga përvoja e viteve të mëparshme, ku shumë fitues kanë abuzuar me kohën e paraqitjes në bankë, këtë vit, bashkia vë në dispozicion një afat 4-mujor për t’u paraqitur pranë bankës për lidhjen e kontratës. Në rast se familjet përfituese nuk e respektojnë, automatikisht banka do të vijojë me familjet e vëna në listë pritjeje.

Lista e fituesve që do miratohet sot në Këshillin Bashkiak të Tiranes. /Panorma