Një ari i cirkut u egërsua dhe sulmoi trajnerin e tij, ndërsa e gjithë kjo ndodhi nën pamjet e fëmijëve që bërtisnin nga frika. Ariu ngjyrë kafe u egërsua pasi trajneri e detyroi atë të veprojë si një njeri, transmeton Telegrafi. Bisha menjëherë e sulmoi trajnerin duke e rrëzuar atë për toke.
Fëmijët e ulur vetëm disa metra larg dhe pa pengesa mbrojtëse, dëgjohen duke bërtitur ndërsa një punonjës tjetër i cirkut e shkelmon kafshën e egër. Bisha 270 kilogramëshe u ndalua me një pajisje elektrike, pasi publiku u largua për në daljen e vetme që kishte ky lokal. Trajneri i sulmuar nga ariu kuptohet se është i lënduar, por nuk u dhanë detaje tjera.
Një nënë që e filmoi skenën shqetësuese në qytetin Olonets të Rusisë, tha: “Gjunjët e mi po dridhen akoma. Unë u trondita që nuk kishte asnjë pengesë për sigurinë e spektatorëve, duke pasur parasysh madhësinë e ariut”. Një prind tjetër tha: “Spektatorët nxituan jashtë në panik, duke më përfshirë edhe mua”.
Një tjetër shtoi: “Në fillim, për disa sekonda, ndërsa filmoja ngjarjen, të gjithë menduan se ishte një skenar. Por kur asistenti filloi të godasë ariun dhe mjetin elektrik për t’a ndaluar atë, filloi paniku. Njerëzit u ngritën dhe vrapuan për në dalje”. Edhe pasi ariut iu dha një goditje elektrike ai nuk u rrëzua menjëherë, por vraponte i tërbuar duke i tmerruar kështu të pranishmit.
