VLORË – Ndërsa te tregu i fruta-perimeve qytetarët numërojnë qindarkat për të blerë dy banane, pak metra më tej, në sallën e freskët të Asamblesë së Partisë Socialiste, ajri rëndonte nga… përgjegjshmëria.
U diskutua “hapur”. Aq hapur, sa u pa qartë se sfidat tona nuk janë as nafta e shtrenjtë dhe as xhepat bosh të pensionistëve, por si të gjejmë fjalë edhe më të bukura për të përshkruar “punën konkrete” që po bëjmë.
Ja pikat kyçe të “Vizionit” që na u shpalos:
Më shumë kohë pranë njerëzve: (Me siguri e kishin fjalën për tregtarët që po falimentojnë, por ndoshta i kanë parë vetëm nga xhamat e zinj të makinave gjatë rrugës për në mbledhje).
Përmirësimi i jetës së çdo familjeje: Një premtim që të ngroh zemrën, sidomos kur e dëgjon teksa çmimi i djathit rritet me ritmet e një rakete hapësinore.
Forcimi i shtetit të së drejtës: Drejtësia është e qartë – ju keni të drejtë të ankoheni, ne kemi të drejtë të mbajmë mbledhje e të duartrokasim veten.
Me “besim të plotë” te vizioni, vijojmë përpara. Se ku po shkojmë saktësisht, këtë nuk e tha njeri, por e rëndësishme është që “fokusi mbetet i qartë”. Aq i qartë sa po na verbon!
Erand Haruni
