Mbivendosja e gripit sezonal me virusin Covid-19 mund të sjellë përkeqësim të situatës së pandemisë në vend. Ministrja e Shëndetësisë, Ogerta Manastirliu, thotë se kurba e rasteve të reja mund të rritet ndaj në përgjigje të nevojave do të shtohen kapacitetet në spitalet rajonale deri në 1 mijë shtretër. Ndërkohë në 24 orët e fundit janë shënuar 158 raste të reja me Covid, ndërsa 3 pacientë kanë humbur jetën.

Infektimet e reja me Covid-19 mund të pësojnë rritje gjatë vjeshtës dhe dimrit. Mbivendosja e gripit stinor me virusin aktual mund të përkëqesojë situatën, por Manastirliu tha se Ministria e Shëndetësisë është e përgatitur për çdo skenar.

Për të shmangur fluksin në spitale, vëmëndje të veçantë gjatë dimrit do të marrë trajtimi në banesë i të prekurve me Covid. Sjellja individuale është e rëndësishme, ndaj në seancën dëgjimore në Komisionin Parlamentar të Shëndetësisë, Ministrja apeloi kujdes në respektimin e masave anti-Covid. Për t`ju përgjigjur nevojave shëndetësore të qytetarëve, Ministria do të rrisë numrin e ekspertëve në terren. Vaksina ende nuk është siguruar por Manastirliu garantoi se kur ajo të jetë efikase do të aksesohet për qytetarët shqiptarë.

Ndërkohë në 24 orët e fundit në Shqipëri janë shënuar 158 raste të reja me Covid 19 dhe tri humbje jete ndërkohë që në spitalin Infektiv dhe Shefqet Ndroqi po trajtohen 214 pacientë.