Pasi kupola e Policisë së Sarandës u shkri nën dyshimet se u korruptua për të lejuar ndërtimin e një beach bari pa leje, Inspektorati i Mbrojtjes së Territorit ka vijuar sot me prishjen strukturave të ngritura për nisjen e sezonit turistik.
Report Tv sjell pamjet nga zona e cila është rrethuar me shirit dhe fadromat që kanë nisur punën për të shembur strukturat e drunjta për beach barin dhe vendosjen e shezlongëve e çadrave. Avokati i pronarëve të subjektit pretendon se stacioni i plazhit në Kanalin e Çukës është ndërtuar me leje nga KKRRT-ja.
“Vendim i paligjshëm. IKMT ka pretenduar se ndërtimi është pa leje. Sjell në vëmendje që bari ka qenë ekzistues, me dokumente pronësi në emër të Arjola Dhrami Bajo. Stacioni është me leje, me vendim të KKTU-së dhe në mënyrë abuzive po kërkohet të prishet një biznes i ndershëm”, thotë avokati Rigels Dervishi.
“CopaCabana Beach’ është beach bar-i dhe stacioni i plazhit në Kanalin e Çukës në Sarandë, përgjatë vijës bregdetare, ku ndodhen gjithashtu disa nga hotelet dhe resortet më të njohura dhe luksoze të qytetit. Pronarja në letra, Arjola Dhrami Bajo rezulton ende në kërkim për ndërtimin pa leje.
