Fax News mëson detaje të reja nga ngjarja e rëndë e ndodhur në Elbasan, ku u grabit dhe u dhunua nga 4 persona, taksisti Andi Vyshka.
Si autorë të ngjarjes u identifikuan Thanas Bejko 33-vjeç dhe Ertis Skilja 42-vjeç, përgjegjësi i lokalit dhe shoku i tij.
Ata kanë parë që taksisti Andi Vyshka kushëri me gjyqtaren Zamira Vyshka, ka pasur një shumë prej 2000 eurosh me vete, ia kanë grabitur dhe e kanë mbajtur për disa orë që të mos tregonte.
Bashkë me ta janë arrestuar dhe dy kamarierët e lokalit, të cilët kanë dhënë dëshmi të rreme përpara policisë.
Në një komunikim me Fax News, Vyshka është shprehur se me lekët që kishte me vete do të paguante shkollën e të bijës.
“Jam grabitur me dhunë nga persona tek lokali. Më kanë mbajtur deri në 2 të natës peng, deri sa gjeta mundësi të lajmëroja policinë. 2000 euro më kanë marrë do paguaja shkollen e gocës”, është shprehur Vyshka.
Njoftimi i policisë për ngjarjen:
Vjedhin me dhunë, si dhe mbajnë peng për disa orë klientin, Policia vë në pranga autorët
Në pranga përgjegjësi i lokalit dhe shoku i tij për vjedhje me dhunë dhe heqje të paligjshme të lirisë.
Në pranga dhe dy kamerierët e lokalit për deklaratë të rreme e veprime që pengojnë zbulimin e së vertetës.
Specialistët për hetimin e krimit në Komisariatin e Policisë Elbasan pas denoncimit të marrë nga një shtetas (taksit), i cili kishte qëndruar për kafe në një lokal në Elbasan dhe aty i kishin vjedhur një shumë eurosh dhe e kishin mbajtur peng për disa orë, menjëherë kanë organizuar punën për zbardhjen e ngjarjes, identifikimin dhe kapjen e autorëve.
Falë veprimeve të shpejta kanë bërë të mundur zbardhjen e ngjarjes, identifikimin dhe arrestimin e autorëve, konkretisht shtetasit:
Th. B., 33 vjeç dhe E.S., 42 vjeç, banues në Elbasan (përgjegjësi i lokalit dhe shoku i tij).
Arrestimi i tyre u bë pasi në ambientet e një lokali në fshatin Katund i Ri, Elbasan, këta shtetas në bashkëpunim me njëri- tjetrin i kanë vjedhur me dhunë një shumë prej 2000 eurosh dhe e kanë mbajtur peng për disa orë shtetasin A.V., i cili punon taksit dhe kishte ndaluar aty për të pushuar. Këta shtetas kur kanë parë që taksisti kishte një shumë eurosh me vete ja kanë vjedhur me dhunë dhe e kanë mbajtur për disa orë që të mos tregonte.
Gjithashtu po në vijim të veprimeve hetimore të kryera nga specialistët për hetimin e krimit në Komisariatin e Policisë Elbasan, u arrestuan në flagrancë për veprat penale “Veprime që pengojnë zbulimin e së vërtetës” dhe “Deklaratat e rreme përpara oficerit të policisë gjyqësor”, shtetasit E. I., 20 vjeç dhe E.Gj., 20 vjeç, ( kamarierët e lokalit), të dy banues në fshatin Katund i Ri, Elbasan.
Materialet i kaluan Prokurorisë pranë Gjykatës së Shkallës Parë Elbasan, për veprime të mëtejshme.
