Policia e Tiranës ka arritur të identifikojë dhe vërë në pranga një 30-vjeçar, i cili akuzohet për vrasjen e shtetasit Emiljano Boçi, ngjarje kjo e ndodhur rreth një vit më parë, konkretisht më datë 14 janar 2018.
I arrestuari është shtetasi Tori (Hektor) Xhecuka, 30 vjeç, lindur në Burrel dhe banues në Tiranë, indaj të cilit rëndojnë akuzat e “Vrasjes me paramendim” e kryer në bashkëpunim dhe ajo e “Prodhimit dhe mbajtjes së armëve luftarake”.
Më tej në njoftimin e policisë thuhet se: “Për arsye hetimi në funksion të zbardhjes së plotë të kësaj ngjarje, nuk bëhen me dije detaje të tjera.”
Pas njoftimit të policisë, kanë dalë edhe fotot e të arrestuarit Hektor Xheçuka.
Kujtojmë se, ngjarja e rëndë ndodhi në rrugën “Shefqet Musaraj” në datën 14 janar të këtij viti, ku viktima u gjet në një mjet i plagosur, por më pas ka humbur jetën në spital. Viktima, Emiljano Boçi, 32 vjeç dhe i plagosuri Melvin Disha, 27 vjeç, shokë me njëri-tjetrin u qëlluan sapo kishin dalë nga një restorant peshku së bashku. Viktima dhe shoku i tij i plagosur sapo ishin kthyer nga Gjermania 2 javë para ngjarjes.
