Emo.cione, lot dhe familjarë të shumtë, është kjo gjendja në Rinas, pak minuta para se të mbërrijë avioni me 5 të riatdhesuarit e parë nga kampi Al Hol në Siri. Daja i Endri Dumanit është shprehur se ata kërkojnë që ta kenë të miturin sa më shpejt pranë familjes, por do të dakordësohen më parë me strukturat shtetërore, në rast se të kthyerit do të kenë një trajtim psikologjik të veçantë.
Sa i takon motrës së Endrit, Eva Dumani, e cila nuk ka pranuar që të kthehet, daja i bëri një thirrje dhe nga mediat, që ajo të jetë sa më parë pranë familjes së saj, nënës dhe të vëllait, pasi sipas tij ata janë njerëzit më të shtrenjtë për të. “Shpresojmë që dhe ajo të kthehet ne jemi duke pritur, i bëj thirrje që ti bashkohet familjes, të veprojë siç ka bërë deri para 10 ditësh.
Ajo nuk po bashkëpunon për tu kthyer, vendi i saj është këtu te nëna dhe te vëllai”, u shpreh Xhetan Ndregjoni, për gazetarin e Fax News Fatjon Gjinaj. Ndërkohë që dhe për kushërirën e Endri Dumanit, rikthimi i të afërmit të saj duket ende i pabesueshëm.
“Mezi e kemi pritur, na duket ende e pabesueshme, pa e prekur, pa e parë si është. Kemi vite që e prisnim rikthimin, dhe na dukej çdo herë e më larg, tani na duket ende e pabesueshme.
Na duket më i burrëruar, babai im Xhetani ka qenë një nga njerëzit që ka pasur më shumë kontakte, është 13 vjeç po sjellja, mënyra e qendrimit, janë emocione shumë shumë të mëdhaja. Na kanë thënë që po punohet dhe për rikthimin e Evës, Endri do jetojë me nënën e tij kur të kthehet, do merret shteti fillimisht, pasi kanë nevojë për përkujdesje tjetër”, shprehet kushërira e fëmijëve Dumani.