Ditën e sotme, ish-Sheshi “Shqiponja” është bllokuar tërësisht për automjetet dhe ka nisur punimet, gjë që ka shkaktuar trafik të rënduar që në orët e para të mëngjesit. Ndonëse ka rrugë dytësore për të hyrë apo dalë nga Tirana, lëvizja e shtuar e makinave ka shkaktuar një kaos të vërtetë.
Drejtuesit e Policisë Rrugore dhe ARRSH kanë sqaruar se zona e Doganës do të mbetet e bllokuar për katër muajt e ardhshëm kur punimet për kenë përfunduar krejtësisht. Qytetarët që vijnë nga jugu të përdorin Rrugën e Elbasanit për të hyrë në Tiranë, ndërsa ata që vijnë nga Kavaja dhe nga Durrësi të përdorin rrugën e vjetër të Ndroqit.
Ndërsa në rrugën e Doganës do të kenë akses vetëm ambulancat që vijnë për raste urgjence.
Prej kohësh ndërtimi i Unazës së Madhe ishte shndërruar në një stres për trafikun e kryeqytetit, i cili në mëngjes dhe në mbrëmje rezultonte më i rënduar se në orët e tjera të ditës. Kujtojmë se ka pasur përplasje të forta për shembjen e banesave, një pjesë e të cilëve janë shpronësuar dhe një pjesë jo për shkak të mungesës së legalizimit të pronës. Megjithatë qeveria mori vendimin që të vijojë punimet dhe historia e Unazës së Madhe të marrë fund një herë e mirë.