Kur e gjithë vëmendja është e përqendruar në spitalet Covid në vend, dhjetra pacientë të tjerë edhe në spitalet rajonale janë duke vuajtur mungesën e shërbimit.
Pacientët në qendrën e dializës në spitalin rajonal të Korçës bëjnë apel për ndihmë pasi ka katër ditë që nuk u bëhet dializa. Pacientët ndodhen në ambientet e jashtme të pavionit të shqetësuar dhe shprehen se ndihen të kërcënuar pasi askush nga mjekët nuk i përgjigjet kërkesave të tyre.
Ata thonë se shkak për këtë sorrollatje është bërë fakti se një prej pacientëve që bënte dializë ka dalë me Covid, ndërkohë që tamponi i është bërë një muaj me vonesë, që nga momenti kur ka nisur të ketë shenjat e para të sëmundjes.
Bashkëshorti i njërës prej pacienteve tregon se nuk i jepet shërbimi për shkak se bashkëshortja e tij ka pasur simptoma të Covidit por nuk i ka dalë ende përgjigjae tamponit dhe për këtë arsye nuk i japin shërbimin e dializës.
“Problemi është këtu, nuk po hyjmë dot në dializë, kemi katër ditë, ne duhet ta bëjmë një ditë po një ditë jo. Infermierët nuk na fusin në dializë, thonë që në furgonin që vimë ne ka dalë një person me Covid, gjë që nuk është e vërtetë, dhe në rast se ne kemi pasur kontakt me të, të na bëjnë tampon.
Këtu as temperaturën nuk na e masin, se këta bejlerët vinë kur duan në punë, ndihemi të klërcënuar shumë, na bëjnë presion. Sa erdhi doktori më tha pse bën llafe, se të kap në fyt dhe tëe mbys, e dyshuara që doli pardje me Corona, kishte një muaj që e mbanin me oksigjen dhe nuk i bënin tampon. Kur erdhi në pikën e fundit, i bënë tampon”, shprehet i revoltuar një prej qytetarëve.