Lajme

“Kufijtë të mbyllur deri në 15 qershor me BE”

Ministri i Brendshëm Sandër Lleshaj deklaroi sot se kufijtë me BE do të qëndrojnë mbyllur deri në 15 qershor, ndërsa pas kësaj date do vlerësohet situata e pandemisë, gjë e cila do të lejojë ose jo hapjen e kufijve. “Kufijtë në perceptimin tim do të hapen kur kjo çështje të arkivohet. Kufijtë janë çështje e dy palëve. Deri në 15 qershor është fakt që janë të mbyllur me vendet e BE. Ndërkohë që gjasat janë edhe përtej”. Sa i përket Kosovës dhe Maqedonisë së Veriut, Lleshaj tha se, “ne kemi interes të madh të kemi kufijtë të hapur. Sepse turizmi është tubi ynë i oksigjenit, por duhet të balancojmë sigurinë e jetës së qytetarëve dhe të ardhurave nga turizmi”. Në një intervistë televizive, Lleshaj tha se, “autoritetet po punojnë për një skemë për heqjen e masave kufizuese, por kjo bazohet tek shpërndarja e COVID-19 në ditët në vijim”.

“Çdo ditë po punohet intensivisht për të aplikuar një skemë çlirimi nga këto kufizime, të cilat duhet të shoqërohen me garancinë për mosrikthimin e kësaj situate. Askush nuk ka interes për rikthimin e kësaj situate“, tha Lleshaj. “Pa u zbuluar një vaksinë nuk mund të kemi jetë normale si përpara virusit”, tha Lleshaj. I pyetur nëse është e shpërpjesëtuar liria e lëvizjes së qytetarëve në raport me kërcënimin që kemi për momentin, Lleshaj tha se, “jo, madje po bëhet çdo ditë përpjekja që të ruaj këtë ekuilibër të artë. Ne nuk jemi Gjermania dhe nuk mund ta përballojmë pandeminë vetëm me sistemin shëndetësor”. I pyetur për aplikimin për pasaporta, Lleshaj tha se, “është hapur dhe është thjeshtuar në mënyrë radikale procedura”. “Deri para koronavirusit qytetari duhet të shkonte fizikisht në komisariat dhe pastaj tek zyra e ALEAT. Tani bëhet aplikmi në e-Albania dhe komisariati merr kohën 8 ditë për të verifikuar të dhënat për aplikimet e zakonshme ose 24 orë për procedurën e përshpejtuar. Më pas i dërgon një e-mail qytetarit ku i thuhet që u verifikuan të dhënat dhe qytetari shkon tek zyrat e ALEAT për të kryer aplikimin”, tha Lleshaj. Lidhur me përdorimin e pasaportave me afat të përfunduar, Lleshaj tha se ato mund të përdoren brenda vendit në disa shërbime. “Pasaportat e skaduara janë konsideruar të vlefshme për shërbime të brendshme, banka e kështu me radhë. Shërbimet kryesore në vend do të vazhdojnë t’i pranojnë”, tha Lleshaj. Lleshaj, tha se nga java e ardhshme do të nisë hapja e disa procedurave, me të cilave edhe shërbimet e martesave. “Nga e hëna e ardhshme fillojnë shërbimet kryesore të gjendjes civile, mes të cilave edhe shërbimet e martesave”, tha Lleshaj.

Artikuj të ngjashëm

Leave a Reply

Your email address will not be published. Required fields are marked *

Back to top button
Close
%d bloggers like this: