Lumi i Gjanicës i cili gjarpëron në mes të qytetit të Fierit vijon të mbetet totalisht i ndotur edhe pse Rafineria e Ballshit nuk është funksionale. Ngjyra e errët dhe era e pakëndshme është ajo e cila shoqëron qytetarët fierak të cilët kërkojnë të bëjnë një shëtitje normale në trotuaret afër lumit. Ndotja vjen prej Azotikut në Fier si dhe derdhja e hidrokarbureve në këtë lumë.
Në një intervistë të zhvilluar nga ambientete e lumit, ambientalisti Qani Veli u shpreh se për shkak të ndotjes së lumit shumë banorë janë larguar nga shtëpitë që banonin aty pranë pasi ndotja dhe era e keqe është e papërballueshme. Madje ambientalisti thekson se hidrokarburet e kanë bërë Gjanicën një lumë të vdekur ku nuk mund të gjesh asnjë gjallesë. Megjithatë ai u shpreh se nëse do të ketë vullnet nga organet ligjzbatuese ky lum mund të rikthehet në normalitet.
“Nuk ka asnjë gjallesë në këtë lumë. Është për të ardhur keq ajo që ndodh në lëtë lunë. Nëse do të ketë vullnet nga organet e shtetit Gjanica mund të rikthehet në normalitet. Këtu një pjesë e mirë që kanë banesat janë larguar pasi e kanë tepër të vështirë të jetojnë. Ky lum derdhet në detin Adriatik, dhe ndotja që erdhi prej këtu shkaktoi shumë probleme të lëkurës të plazhistëve në Durrës”. – u shpreh Veli.
