Ditën e sotme do të vijojë mësimi pjesërisht në disa shkolla, për disa nxënës të cilët nuk kanë zhvilluar mësim online, që pas mbylljes si pasojë e Covid-19. Mësimi do të zhvillohet për nxënësit e klasave nga 1-5 që nuk kanë pasur akses në mësimin online, ndërkohë që shkolla ka marrë masa për parandalimin e përhapjes së Covid-19.

Orët mësimore gjatë kësaj periudhe do të zhvillohen sipas të gjitha protokolleve të kushteve higjieno-sanitare, duke ruajtur distancimin fizik dhe mbrojtur shëndetin e gjithsecilit. Fax News ka bërë mëngjesin e sotëm një vëzhgim në një shkollë në kryeqytet dhe qytete të tjera të Shqipërisë, ku fëmijët janë paraqitur me maska, ndërkohë që mësuesit i udhëzojnë që të mbajnë distancën sociale.

Berat – Gazetarja Mimoza Sinanaj raporton se janë katër shkolla që do zhvillojnë sot orë mësimore, tre brenda në qytet dhe njëra ne njësinë administrative Roshnik.

Divjakë – Gazetarja Marsela Topi raporton se 4019 nxënës rikthehen në shkolla në bashkinë e Divjakës duke respektuar masat anticovid, ndërkohë që 304 nxënës do të ulen për herë të parë në bankat e shkollës.

Elbasan – Gazetarja Entela Duka bën me dije se 1373 nxënës ne Elbasan nuk kanë patur mundësi të ndjekin mësimin online gjatë periudhës së pandemisë ndaj sot janë kthyer në shkollë.

Kukës – Sot ka filluar mësimi në 9 shkolla të ndryshme në njësi administrative të Kukësit, të cilët kanë mbetur mbrapa për shkak të mungesës së internetit gjatë pandemisë, raporton gazetari Emal Hallaci.

Vlorë – Gazetarja Afrovita Hysaj raporton se në Bashkinë e Vlorës dhe Himarës fillojnë sot mësimin vetëm 76 fëmijë.