Kryeministri Edi Rama ripërsëriti sot thirrjen për të gjithë emigrantët që e kanë një shtëpi në fshat, një tokë, një lidhje të investojnë kursimet e tyre aty dhe nëse nuk fitojnë më shumë nga ai investim në agroturizëm sesa fitojnë nga puna e zakonshme atje ku janë atëherë borxhi është i imi dhe i këtyre përfaqësuesve të bujtinave.

Gjatë qëndrimit në Lezhë, Kryeministri Rama takoi disa përfaqësues të bujtinave në agroturizmin “Hylli i Dritës”, ku theksoi se kam folur më ta përpara dhe më thanë ia kemi borxh bashkë kujt nuk i del siç na ka dalë ne.

Më tej Rama tha se “jam këtu me një diell e pesë yje. Kjo është Diella, e famshme e të parës iniciativë mikpritjeje në gjithë zonën e Lezhës. Shkoni tek Diella dhe do të më kujtoni. Këtu është edhe përfaqësuesi i Rapsodisë, është një studio arti kuzhine në zonën e Lezhës. Këtu është vila Veneto, një tjetër vend ku nuk është puna se mund të shkohet të hahet e të pihet, por edhe të shijohet ushqimi në kushte realisht artistike”.

“Këtu është Hylli i Dritës, po të vini këtu do ta kuptoni që ky është një nga pesë yjet e zonës. Dhe këtu është edhe ylli më i ri Hani i Leks. Ndërsa Altinin e Mrizit të Zanave e njeh gjithë Europa. Këta janë  shembujt që flasin me vepra dhe vepra e tyre u tregon të gjithëve se kush do, kush ka ide, ka kurajo, kush nuk ia përton punës jo bën sukses, por art të suksesshëm me prodhimet, peizazhin, traditën, historinë familjare, me shtëpinë e  vjetër të stërgjyshërve, që e kthen në pikë pritje ku duhet të mbash  radhë për të gjetur një vend”, u shpreh Rama.