Më shumë se 50% e qytetarëve në Tiranë e kanë kaluar Covid 19. Ky është rezultati i një studimi të bërë nga Akademia e Shkencave, i cili po prezantohet në këto momente nga imunologu Genc Sulçebe. Sipas mjekut të njohur imunolog, shumica e qytetarëve në Tiranë që e kanë kaluar Covid 19 janë asimptomatikë, e megjithatë kanë arritur që të krijojnë antitrupa, duke u bërë në këtë mënyrë imun.
Ndërkohë që sipas të dhënave në të gjithë vendin mbetet ende e ulët përqindja e personave që e kanë kaluar Covid. Tirana ka numrin më të lartë të personave që e kanë kaluar Covid, ndërsa në rang vendi llogaritet që 25% e qytetarëve janë ekspozuar ndaj virusit.
“Në fund të 2020 mbi 50% e popullsisë së Tiranës janë imunë ndaj koronavirusit. Përparësi të vaksinohen ata që nuk e kanë kaluar infeksionin. Sepse janë më të brishtë, Të tjerët kanë anti-trupa. Studimin e realizuam në tre faza për të parë si ishte gjendja pas lock-doën. Bëmë sondazh tek 124 individë dhe rezultoi se vetëm 1 ishte pozitiv. Kontakti i virusit me popullatën ishte minimal. Pra na nxiti që të shohim gjendjen e shtrirjes në një popullatë më të gjerë.
U përzgjodhën popullatat e disa qendrave shëndetësore, me rreth 200 mijë banorë. Dolën pozitivë 48.5%. Ky është konkluzioni që nxjerrim sot. Pra kemi qenë në kontakt me virusin dhe janë të imunizuar dhe shpresojmë që ky imunitet të jetë afatgjatë. Kjo popullsi përfaqëson atë të Tiranës. Gjysma e popullatës së Tiranës e kanë kaluar pandeminë dhe janë imunizuar në mënyrë natyrale”, u shpreh gjatë prezantimit Sulçebe.