Lajme

Vlorë/ Detaje të reja nga lajmi i anijes në Karaburun (Foto)

Në orët e pata të mëngjesit të sotëm anija turistike ‘Aqua Marine’ është përfshirë nga flakët pranë brigjeve të Karaburunit në jug të vendit. Ekuipazhi me 5 persona në bord ka qenë në gjumë në momentin kur janë shfaqur flakët dhe kanë arritur të shpëtojnë pa dëmtime duke u hedhur në det. Anija turistike përshkruante linjën Vlorë-Karaburun.

Në lidhje me ngjarjen reagoi edhe policia Kufitare. Në njoftimin e Policisë thuhet se “mjeti lundrues i “Aqua Marine” duke qenë se punon me turistët nga Moli i Vlorës drejt Karaburunit, për shkak të luhatjeve të kohës, është shkëputur nga Moli i Vlorës në fundjavë dhe është ankoruar në Karaburun, me qëllim që të ishte e përgatitur për vozitjen e turistëve atje.

Në orët e para të mëngjesit në Karaburun pranë plazhit të Shën Vasilit, në këtë mjet lundrues ka rënë zjarr duke u rrezikuar jeta e disa shtetasve.” Pas njoftimit të marrë, Policia Kufitare me mjetet e saj lundruese, nën drejtimin orientues të QNOD Durrës, shkoi në ndihmë të personave që kërkuan ndihmë, duke bërë të mundur konstatimin e mjetit lundrues pranë gjirit të Dhimokushtës dhe shpëtimin e sigurt të personave në bordin e saj.

Në këtë mjet lundrues ndodheshin 5 persona, të cilët nuk kanë probleme dhe janë në gjendje të mirë shëndetësore. Si pasojë e flakëve, mjeti lundrues është djegur pothuajse plotësisht. Grupi hetimor po kryen veprimet e mëtejshme në lidhje me sqarimin e rrethanave dhe zbulimin e shkaqeve të rënies së zjarrit. Ndërsa drejtoria e Përgjithshme Detare është njoftuar nga një anije tjetër për akostimin e anijes turistike në gadishullin e Karaburunit.

“Sot në orën 05:51 Kapiteneria e Portit Vlorë u njoftua nga kapiteni anijes A/T ‘Black Pearl’ se anija turistike ‘Aquamarine’ ishte përfshirë në flakë të mëdha në largësi e cila ndodhej e akostuar në plazhin e Dhim Kushtes në Karaburun. Në orën 05:55,  u kontaktua me kapitenin e A/T AKUAMARINE dhe pronarin dhe konfirmuam se rreth orës 03:45, anija është përfshirë nga flakët si pasojë e një mase elektrike. Përfshirja e anijes në flakë ka qenë e menjëhershme dhe s’kanë pasur kohë të merrnin masa për fikjen e zjarrit dhe janë hedhur në det të gjithë personat. 5 persona në bord kanë dalë në breg pa lëndime, vetëm dëme materiale.

Në orën 05:59 u njoftua Kapiteni i Portit për gjithë situatën e ndodhur deri në atë moment. Në 06:05 u komunikua me QNOD e cila ishte në dijeni për ngjarjen dhe kishte marrë njoftim nga Policia Kufitare. Në bord gjendeshin rreth 230 litra naftë, të cilat u dogjën totalisht gjatë procesit të flakëve”, thuhet në reagim. Drejtoria kërkon nga Regjistri Detar Shqiptar si organi kontrollues dhe certifikues i anijeve që të marrin masa dhe të jenë të rreptë në inspektimet dhe certifikimet e anijeve dhe standardet e tyre.

Artikuj të ngjashëm

Leave a Reply

Your email address will not be published.

Back to top button
Close