Gazetari i kronikës Artan Hoxha ka folur sërish rreth zhdukjes së të shumëkërkuarit të drejtësisë, Ervis Martinaj, ku që prej fillimit të muajit gusht nuk ka më asnjë gjurmë prej tij.

I ftuar në emisionin “Më lër të flas”, gazetari është pyetur se çfarë mendimi ka për zhdukjet e fundit, duke iu referuar asaj të “mbretit të lojërave të fatit”.

Hoxha la të nënkuptohet se në këtë ngjarje, janë të përfshira grupet kriminale nga Vlora. Ai tha më tej se grupet kriminale nga Vlora dhe Shkodra, zakonisht nuk dalin nga zonat e tyre, pasi i “ha këneta e Durrësit”, siç i quajti ai grupet kriminale të Shqipërisë së Mesme, por sipas tij, tek kjo ngjarje janë të përfshirë vlonjatet.

“Si do që të dridhem, ngado që ta kap seç më hyn Vlora prap në lojë, nuk di ça ti bëj. Vlonjatët dhe shkodranët kanë një gjë të mirë. Vlonjatët nuk e kalojnë Vjosën, ndërsa shkodranët nuk e kalojnë Bunën, janë atje brenda për brenda. Të dyja palët kanë një të keqe, kur dalin i ha këneta e Durrësit. Kështu, që më mirë mbajnë atë distancën, atje tëk habitati i vet. Por, tek këto ngjarjet e fundit, për dreq vlonjatet janë brenda. Kriporja është në Vlorë, çdo ngjarje do një çik kripë se me sheqer ajo të ballajdis” u shpreh Artan Hoxha.