Rei Manaj është sërish protagonist në Superligën turke. Sulmuesi shqiptar shënoi golin në sfidën që skuadra e tij Sivasspor luajti kundër Fenerbahçes në Stamboll.
Pjesa e parë u mbyll me avantazhin 2-0 të verdhebluve. Manaj shënoi në minutën e 50 duke bërë të heshte stadiumi “Sukru Saracoglu” e duke rihapur lojën.
Por Fenerbahçe ishte një ekip shumë i fortë për Sivasporin, që u ndëshkua edhe dy herë.
Lojtari 26 vjeçar vazhdon me formën mjaft të mirë në kampionatin turk. Ai shkon në kuotën e 5 golave të shënuar pas 12 takimesh të luajtura ndërsa ka dhënë edhe 1 asist.
Në total, Manaj ka luajtur 617 minuta. Futbollisti shqiptar ka shënuar edhe tri gola në Kupën e Turqisë. Manaj u bë pjesë e Sivasporit në verë dhe ka firmosur një kontratë deri në qershor të 2026-ës.
