Pandemia COVID-19 ka prekur edhe Izraelin, mirëpo krahasur me shumë vende të tjera të botës ka një numër më të ulët të rasteve. Mjekja shqiptare në Izrael, Jusinga Mashah, gjatë një interviste për Ora News, tha se shembulli i Izraelit tregon se sa më shumë të zbatohen rregullat e mbrojtjes dhe distancimit social nga popullsia, aq më e afërt dhe e sigurt është strategjia e daljes nga kjo pandemi. Ajo tregon se në kuadër të masave të marra nuk është lejuar as kalimi i qytetarëve nga një qytet në tjetrin.
“Janë marrë masa që jo vetëm të mos kalohet nga qyteti në qytet, por edhe izolim në shtëpi, duke mos u lejuar që të dalësh jo më larg se 100 metra nga shtëpia. Kjo përjashton mjekët, farmacistët dhe të gjitha ata që kanë një punë të rëndësishme për mbijetesën e popullsisë” – deklaroi ajo.
Sipas mjekes Mashah, Izraeli tashmë do të kalojë në fazën e dytë, ku do të hapen më shumë dyqane, do të liberalizohet lëvizja, por jo në grumbullime njerëzish. Ndërkohë, statistikat e ditëve të fundit tregojnë ulje të rasteve në Izrael, e deri më tani atje janë konfirmuar vetëm 13 mijë raste ndërsa janë shënuar 172 viktima.
