Në vijim të kontrolleve të kryera mbi bazën e informacionit operativ për kapjen e personave të shpallur në kërkim, struktura të DVP Shkodër, në bashkëpunim me Komisariatin e Policisë Malësi e Madhe dhe me mbështetjen e Forcës së Posaçme “Shqiponja”, finalizuan operacionin policor të koduar “Wanted”.
Si rezultat i këtij operacioni, u arrestua shtetasi B. B., 33 vjeç, banues në fshatin Premal. Ai i ishte shpallur në kërkim për veprën penale “Shkelja e ligjit për lëndët narkotike” në bashkëpunim, sipas urdhrit të Gjykatës së Magjistraturës në Westminster, Mbretëria e Bashkuar. Gjykata e Shkallës së Parë Shkodër i ka caktuar masën e sigurisë “Arrest në burg”, me qëllim ekstradimin drejt Mbretërisë së Bashkuar.
Materialet procedurale i janë referuar Prokurorisë pranë Gjykatës së Shkallës së Parë Shkodër për veprime të mëtejshme.
