Drejtuesja e Sindikatës italiane ‘INAS’, Beskida Aliaj tregon se si do funksionojë marrëveshja për pensionet me Italinë, kategoritë përfituese dhe se si do bëhet përllogaritja e kontributeve të punës së ushtruar në të dyja vendet.

Rreth 170 mijë pensionistë shqiptarë pritet të përfitojnë nga marrëveshja mes Shqipërisë dhe Italisë. Kështu deklaroi drejtuesja e Konfederatës Italiane të Sindikatave të Punës në Shqipëri, Beskida Aliaj, eksperte, e cila dha detaje rreth marrëveshjes, kushtet që duhet të plotësojnë shqiptarët që dalin në pension apo edhe italianët në Shqipëri. Sipas ekspertes, në bazë të marrëveshjes do të përllogariten kontributet e punës së ushtruar në Shqipëri edhe në Itali dhe secili shtet do të japë pjesën e vet.

Përfitimi i dytë nga marrëveshja varet nga vjetërsia e punës në Itali.
“Në rast se qytetari ka 42 vite e 10 muaj kontribute në Itali për burrat dhe 41 vite e 10 muaj për femrat, mund të dalin në pension në çfarëdo moshe qofshin, pra mund të dalësh në pension edhe 57 vjeç nëse ti ke punuar 45 vite.”. Përveç pensionistëve, Aliaj rendit edhe kategoritë e tjera të cilat përfitojnë nga kjo marrëveshje.

71-vjeçari Bashkim Abazaj emigrant në Itali, i cili ka punuar për 16 vite atje, por vetëm 8 vite i siguruar, tashmë përveç pensionit në Shqipëri do të përfitojë edhe nga Italia për vitet që ka punuar duke u siguruar. Atij i humbasin 4 vite sepse marrëveshja nuk ka fuqi prapavepruese. Pas Italisë, Greqia është një vend ku jetojnë e punojnë një numër shumë i madh shqiptarësh, për të cilët ende nuk ka një marrëveshje 2 palëshe që edhe ata të mund të përfitojnë pension për vitet e shumta që kanë punuar aty.