Një tjetër ngjarje e rëndë ka ndodhur këtë të hënë në Vushtri të Kosovës. Mësohet se ka pasur raportim për të shtëna me armë zjarri. Më pas, policia ka konfirmuar se dy persona kanë ndërruar jetë.

Nga të dhënat e para dyshohet se pronari i një furre buke ka ekzekutuar me armë një punonjëse, ndërsa më pas ka vrarë veten.

Rrethanat në të cilat ka ndodhur ky krim i rëndë janë ende të paqarta. Një ditë më parë, një 19-vjeçar u ekzekutua me armë nga një bashkëmoshatar

Media lokale e Kosovës, Veriu.info, ka publikuar pamje të momentit kur burri i gruas së vrarë mbërrin në vnedin e ngjarjes shumë i rënduar emocionalisht, ndërsa disa të tjerë përpiqen ta ngushëllojnë.

“Në vendngjarje janë gjetur disa gëzhoja që dyshohet se janë përdorur në këtë krim. Janë duke u intervistuar dëshmitarë dhe në koordinim me policinë janë duke u hetuar të gjitha rrethanat që kanë quar në këtë ngjarje të rëndë”, ka thënë Prokuroria në një njoftim për publikun.

Një familjar i të ndjerës, Rrahim Ajeti, ka thënë se viktima ka qenë rreth 40-vjeçare dhe në të kaluarën ka punuar së bashku me bashkëshortin e saj në furrën bukës, në pronësi të autorit të krimit.

“Sipas një informate jo zyrtare, shkaku është xhelozia pse ka shkuar në tjetër vend për të punuar dhe e ka lënë këtu. Kjo është”, ka thënë i afërmi i viktimës.