Janë sulmuar sërish ushtarët e KFOR në Veri të Kosovës. Para pak minutash, protestuesit serbë kanë qëlluar njësitë e KFOR në komunën e Zveçanit me molotov, kapsolle dhe shashka.

Ushtarët kanë urdhëruar mediat që të largohen menjëherë nga zona në momentin kur nisën përleshjet.

“Para pak minutave qytetarët serbë kanë sulmuar edhe një herë ushtarët e KFOR-it. Drejt tyre u hodhën molotov dhe fishekzjarrë e shok bomba. Gjatë tërë ditës në Zveçan ka pasur kërcënime ndërsa në orën 4 protestuesit janë larguar.

Në momentin kur filloi përleshja, ishin ushtarët e KFOR-it që urdhëruan mediat që të largohen nga zona”, tha gazetari i T7, Unitet Berisha.

Ditën e djeshme janë plagosur 25 ushtarë të forcave të KFOR, të cilët ishin objekt i sulmeve të paprovokuarara. Ata u transportuan në spital pasi kishin plagë të rënda si djegie të lëndëve shpërthyese dhe kocka të thyera nga sulmet me shkopa bejsbolli nga protestuesit serbë.