Tirana ka ravijëzuar planin për merkaton e janarit. Trajneri Ardian Mema ka qenë shumë i qartë para presidentit të bardhebluve. Së pari, kërkon një numër jo shumë të madh të lojtarëve, pasi nuk ka shumë dëshirë të popullojë ekipin me emra të tjerë. E dyta, trajneri kërkon 2-3 lojtarë, të cilët jo vetëm të jenë të paguar mirë, por si qëllim ka të bëjnë diferencën në fushën e lojës. Ky është synimi i Tiranës dhe i trajnerit Ardian Mema, pra, të gjejë lojtarë të mirë, të mirëpaguar, por që të bëjnë diferencën. Mema i ka parashtruar idenë presidentit, i cili prej ardhjes së tij te Tirana i ka premtuar se do t’ia plotësojë dëshirat Memës.
TAKIMET – Prej dy ditësh drejtuesit e Tiranës janë duke u takuar kokë më kokë për të zhvilluar strategjinë për skuadrën e 2019-ës. Refik Halili dhe Ardian Mema janë takuar si të mërkurën dhe të enjten për të vendosur planin e punës dhe lojtarët që mund të largohen nga ekipi si dhe ata që pritet të afrohen gjatë kësaj merkatoje. Emrat janë të shumtë, aq sa drejtuesve po u ofrohen lojtarë të ndryshëm, duke filluar edhe ata që më parë kanë veshur fanellën bardheblu. Duhet pranuar se veç Hasanit, pjesa tjetër e lojtarëve në merkaton e verës ka qenë dështim më vete dhe kjo është vërejtur edhe nga rezultatet që ka marrë skuadra gjatë dy fazave të para. Aktualisht, shpenzimet e bardhebluve për një pikë kanë qenë mbi 30 milionë lekë të vjetër, shumë për një skuadër, e cila në fillim të sezonit shpresonte për të qenë në garë për titullin kampion.
SELEKSIONIMET – Mema, i pakënaqur nga të rinjtë e vëzhguar
Ardian Mema duket se nuk ka mbetur shumë i kënaqur nga seleksionimet që ka bërë këto ditë të fundit dhjetori. Burime pranë klubit kanë bërë me dije se trajneri, pasi ka ndjekur nga afër mbi 15 të rinj, nuk është se ka pëlqyer ndonjërin prej tyre. Në shumicën e rasteve ata që bënin diferencë ishin të rinjtë që luajnë tek ekipi i parë si Muçi, Stafa e të tjerë. Mema ka parë me kujdes progresin e tyre për të grumbulluar në ekip ndonjërin, por duhet pranuar se të rinjtë duhet të bëjnë më shumë për të qenë pjesë e ekipit të parë. Vetë trajneri është munduar t’u japë një shans, por me sa duket të rinjtë e skuadrave të vogla nuk ia kanë dalë që ta kapin shansin e dhënë nga trajneri i skuadrës së parë bardheblu.
