Këto 196 automjete të reja do t’i shtohen flotës së Policisë së Shtetit. Ato që do të rinovojnë menjëherë automjetet do të jenë Policia Kriminale, Forcat e Ndërhyrjes së Shpejtë dhe RENEA. Kryeministri Rama thotë se logjistika e uniformave blu ka pësuar një transformim rrënjësor. “Flota motorike e Policisë së Shtetit ishte qesharake. Sot ne i japim punonjësve të policisë një fuqi të re motorike dhe sidomos forcave speciale.
Një flotë të tërë mjetesh që do të mundësojnë kushte optimale operacioneve. Nuk mbaron këtu”. Pjesën më të madhe të financimit e ka bërë Bashkimi Europian, ndaj dhe ambasadori Soreca e vë theksin te lufta kundër trafiqeve.
“Këto mjete do të përdoren për patrullimin, për transportin e oficerëve të policisë, për operacionet kundër drogës dhe për aktivitetet e kufirit në këtë kohë të pandemisë në mënyrë që të bëhet me mirë puna dhe policia të jetë efikase”. Ndërsa Ministri i Brendshëm, Sandër Lleshaj, tha se flota e re do të përmirësojë efiçencën e punës së policisë.
