Të gjithë personat që kërkonin të ishin pjesë e uniformave blu, dje kishin afatin e fundit për të aplikuar e që në vijim të ndjekin Shkollën Bazë për Partullë të Përgjithshme. Aplikues janë mbi 2500 të rinj e të reja. tani është faza e verifikimit, ku një grup i posaçëm do të kalojë në sitë dokumentacionet e dorëzua prej tyre, afati i të cilëve përfundon pas 10 ditësh. Të gjithë aplikantët që nuk plotësojnë kriteret apo kanë mungesë dokumentacioni, do të njoftohen me shkrim nga struktura e burimeve njerëzore. Që nga ai moment, aplikanti i skualifikuar ka të drejtën që ankimimin ta bëjë brenda dy ditëve tek Drejtori i Policisë Vendore ku kishte kthyer aplikimin, e ndërsa ky i fundit pas shqyrtimit duhet të kthejë përgjigje brenda 5 ditësh. Ndërsa të gjithë personat e kualifikuar, do t’i nënshtrohen testimit me shkrim, atij për aftësitë fizike, si dhe testimit me gojë. Në përfundim, fitues do të shpallen vetëm 500 prej tyre.
Procedura
Për përzgjedhjen e kandidatëve, që do t’i nënshtrohen konkurrimit, do të ndiqen hapat e mëposhtëm:
Dorëzimi i dokumentacionit nga aplikanti dhe dhënia e numrit të regjistrimit nga struktura vendore e burimeve njerëzore;
Shqyrtimi i kritereve dhe dokumentacionit nga struktura vendore e burimeve njerëzore, nëse aplikanti plotëson kriteret e përcaktuara;
Verifikimi paraprak i aplikantëve, për rekorde të mundshme kriminale;
Njoftimi me shkrim nga struktura vendore i aplikantëve, që nuk plotësojnë kriteret për të vazhduar testimin;
Dërgimi në Drejtorinë e Burimeve Njerëzore i listës emërore të aplikantëve, që plotësojnë kriteret e përcaktuara;
Hartimi i listës përfundimtare të aplikantëve, që plotësojnë kriteret dhe caktimi i kodit për çdo aplikant nga Drejtoria e Burimeve Njerëzore;
Pajisja e çdo aplikanti me formularin e pranimit dhe numrin personal nga strukturat vendore të burimeve njerëzore;
Publikimi në faqen zyrtare të Policisë së Shtetit dhe në media për datën, orën dhe vendin e zhvillimit të konkurrimit, si dhe listën e kandidatëve që kualifikohen për të konkurruar;
Procesi i apelimit;
Konkurrimi.
Shqyrtimi i dokumentacionit dhe procesi i ankimimit
Afati i shqyrtimit dhe verifikimit të dokumentacionit është 10 ditë punë nga mbyllja e afatit të aplikimeve. Aplikanti që nuk plotëson kriteret dhe nuk ka paraqitur dokumentacionin e kërkuar brenda afatit të aplikimit, skualifikohet duke u njoftuar me shkrim nga struktura e burimeve njerëzore. Aplikanti ka të drejtën e ankimit tek Drejtori i Policisë Vendore brenda 2 ditëve nga data e njoftimit të përgjigjes. Drejtori i Policisë Vendore shqyrton dhe kthen përgjigje brenda 5 ditëve nga data e marrjes së ankesës.
Fazat e konkurrimit
Aplikanti, që kualifikohet për të vazhduar procesin e pranimit në Akademinë e Sigurisë, i nënshtrohet fazave të mëposhtme të konkurrimit:
Testimi me shkrim;
Testimi i aftësive fizike;
Intervistë me gojë, ushtrime vlerësuese dhe testim i aftësive të të shkruarit;
Testimi psikologjik;
Kontrolli shëndetësor;
Marrja e shenjave të gishtave;
Verifikimi përfundimtar i aplikantit
