Një 29-vjeçar nga Maliqi është paraqitur mbrëmjen e djeshme në urgjencën e spitalit të Korçës me dëmtime në trup, duke pretenduar se është dhunuar nga efektivë të policisë greke në qytetin e Kalkidhës.
Sipas informacioneve të konfirmuara nga policia, i riu ka deklaruar se ngjarja ka ndodhur rreth 13 ditë më parë, pasi autoritetet greke e kishin ndaluar duke e dyshuar gabimisht si autor të një vepre penale. Pas verifikimeve të kryera, ai rezultoi i pafajshëm.
29-vjeçari, i identifikuar si Maldin Maxhari, mësohet se ka depozituar kallëzim ndaj policisë greke për dhunën e pretenduar. Më pas ai është dëbuar nga Greqia dhe është kthyer në Shqipëri nëpërmjet pikës kufitare të Kakavijës.
Për shkak të gjendjes shëndetësore dhe dëmtimeve të marra, ai është paraqitur në spitalin e Korçës, ku po merr trajtim mjekësor. Burime paraprake bëjnë me dije se dyshohet për dëmtime në brinjë dhe në shpretkë.
Policia e Korçës ka marrë dëshminë e 29-vjeçarit dhe pritet të përcaktohen procedurat që do të ndiqen më tej, duke qenë se ngjarja e pretenduar ka ndodhur në territorin grek.
